ماتغير شـئ لكن صار فاضي هالمكان..
يعني أن شفت قلبي طحت من عينه وعينه..
كان قلبي لك مدينة ولاحظ أني قلت كـان..
يعني أنت الحين واحد خارج حدود المدينه..
ليه مستغرب كلامي وليه أعطيك الأمان..
وليه تكذب في كلامك العذر وينك ووينه..
ماألومك كان قلبك ثارت أمواجه وخان..
الخطا مني لأني صرت في بحرك سفينة..
والسؤال اللي كتمته ومانطق فيه اللسان..
كيـف إيدك أطعنتني وانا أحسبه أمينه..
جرحي مايرضيه جرحك لو يجي كله حنان..
لو تبوس الجرح فيني أو تقبلها إيدينه..
يوم أحبك قلت كلمة(يكرم المرء أو يهان)
وأنت قلبي ماكرمته وما قدرت أنك تهينه..
عزتي ماهي جديده أنا شامخ من زمان..
أغسل إيدك من رجوعي وروح يا إبن اللذينه..
طاب خاطر قلبي منك وهذي الفرقى رهان..
وحتى لو قلبي يحبك ربي بفراقك يعينه..
تدري لما قلت أحبك قلت وماعندي ضمان..
واختياري كان خاطئ تجربه بالحيل شينه..
كنت تخطي وكنت أسامح مره وثنتين وثمان..
أدمح الزله عشانك واكتم أنفاس الغبينه..
كنت أحبك وكنت أعزك والغلا فيني جبان..
خايف تزعل لو ألومك ضعت مابينك وبينه..
في عيون الناس عادي بس في عيني جنان..
وكان قلبي من يشوفك تفضحه نظرة حنينه..
ماني أول من يحب ومنت أخر شخص خان..
المحبه في زمانك بحرها من غير مينه..
الفشل كان النتيجة واعتقد آن الأوان..
أبني مستقبل حياتي وأنسى قصتنا الحزينة..
وخطوتي الاولى غيابي راح اطبقها عشان..
يبكي قلبك لافقدني والندم يملي سنينه..
جاي تسال عن مكانك هو بقى فيني مكان..
الله يرحمها المشاعر اللي كانت لك رهينه..
قلت لك قلبي مدينه فيك بها حشمة وشان..
لكن أنت الحين اغرب شخص في هذي المدينه..
منقووول من ملاحظه؟؟
الأربعاء أغسطس 03, 2011 3:03 am من طرف زائر
